Karîna Osêyan : WARÊ MIN

Derdê dilê min giran e

Ne mirî, ne jî giyan e

Ezdayî me, kar giran e

Jiyan her barê giran e

Barê giran li ser milan

Bi koçemalî baz didan

Zordest li warê min diman

Min hewar digehand Yezdan

Kanê û ka ye warê min?

Kanê baxçe û baxê min?

Ketin ber talan çûn ji min!

Ax tev rûxandin warê min!

War ket destê hov û guran

Pel ji daran weşiyan

Çilmisin kulîlkên mêrgan

Min xêr nedî ji xweşiyan

Bêjin, kanê ew warê min?

Birakujê me pir dibin!

Ters nabin, bi şûra dibin

Çima nayên hewara min?

Ez Ezda me, kûda herim?

Wenda kirin rê w dirb li min

Kanê ew Kurdistana min?

Ew cih û warê bavê min!

Bê war mam, derb lê ketin

Bêxwedî man, şof pê ketin

Gur û rûvî pey min ketin

Nîne hedan û veketin

Ez Ezda me, wer ku bêjim

Bo Kurdistan xwîn dirêjim

Bo cangoriyan dibêjim

Xwîn rijand wek Firat bêjim

Lê min nedît ew Kurdistan?

Dilim bûye tûrê xeman

Sebr û aram hew min diman

Bûme evdalê dertûlan

Dibêjim û her dixwînin

Bilbil dûr e ji baxê min

Deng nema ku bikim qêrîn

Ka ye Kurdistan, dibêjin?

Êşa dilê min bê hal e

Ez ê bimrim ne li mal

Laşê min li Sîpan xal e

Ezda me, li wir helal e

Min re dibêjin, tu Ezda yî!

Çima ji Kurdistan mayî?

Erê birano tu ka yî?

Bo Kurdistan di xew mayî?

Helbest: Karîna Osêyan-Fransa

Jêder:

 xelat.org

Show More

Leave a Reply

Your email address will not be published. Required fields are marked *