KAWA ÎSA: ÊŞ

Hine dikî tîpên helbesta’

Ew keçika rind û perî

Keçek geh heye, geh tune ye

Sawîr e û geh jî bawerî

Wê derbas kiriye ew hêlên sor

Şikandî kilîta derî

Canê wê j’canê min ducan e

Qeder dergûş ji ber birî

Ramanê wê j’qîzanî dixî

Ew ramanê mi’ yên mirî

Sozdana me her şev li ezman

Hestên me j’ me re rêberî

Sitêran bi biskê wê didrûm

Li newqa wê xweş kemerî

Firiştek qefilî li coşa

Wê bîna me tim digerî

Di tarîya şevê de bi dû

Wê şopa me heyv koçerî

Ewr textê guneha me ye

Bo me buhişt, dojeh şerî

Ew ezman jî ji ber razên me

Bi kenîn û geh bi girî

Ne xweh û ne biratî ye

Ne heval û ne dilber î

Heger ez wê bi nav nîşan kim

Di mafê wê ne dadwerî

Xwedan jî bi wê gewrebûnê

Matmayî li me dinerî

01.03.2017

Kovara Rojava: Hejmara 1ê, zivistana sala 2019ê