EFRÎN: CIWAN QADO

Wek kulîya berfê ya pêşîn

wek bêhna benîştê daran

wek nanxweşkên berî paşîvan

wek qemûşên merd ên gumana nîvcî

wek pîjdankên deştan

wek şevbestên teze yên ber destê sibê

wek rengê paçê ku nih ji ser birînê rabûye

wek qeymaxê zirzîyê yê kizûrî

wek dilopên di sênîkan de civîyayî

wek kêrên di bin balîfan de razayî

wek tama kurkura girîyê bêdeng

Navê te li ser zimanê me distirê

EFRÎN.

Jixwe berî Firdosa gerok a sersar û bêhêvîyan

Bêhêvîyên ku wek berxên reş di nav kerî re li gor fedîya zanebûnê ya jixweber derbas dibin.

fedîya ku ji xwe perdeya jixweberîyê ya hevîrmêşî ye.

dibe tiştek bedîhî di mirovekî de hebe wek hilandina gwîzanekî di bin

balîfa xwe de.

lê mirovekî xurû bedîhî tune.

ji xwe ya ne bedîhî ku mirovek tiştekî bedîhî bibîne.

ka çawa çêkirina arvan û nan bedîhî tê dîtin?

sinetkirina zarokan?

gemkirina gambelekan?

çûna ser tirban sibehên eydan?

vekirina Ta bi derzîyê ve û ji xwe berî her tiştî Ta?

Tayên birînan?

çêkirina zeletê û xwarina wê bi kefçî?

kefçîyê ku tu pê xoşava jixweberîyê li ber serê xilmaşbûyîyan difirfirîne!!!?

Navên Bavan?

Çavên Dêyan?

û Mifta derîyekî ku ev 7 sal pê nehatiye vekirin?

Jixweberî derîyekî li halê xwe sekinî ye, tu dîwar wî hilnagirin û li pişt jî xanî tunene ku tolik û cinan kedî bikin.

xwekeşifkirin e

xwekeşifkirina dîlana sikûnê ye.

Mirêkeke mezin a bermeqlûb e xwe di te re dibîne.

Goleke Avê ye ji ber baranê maye

Parîyekî ezman tê de raxistî ye

KOVARA ROJAVA. HEJMAR(0). SALA 2018ê